Mga konsehal nga identified kay Mayor Joe Espinosa, wala sang plano nga magduso sang reorganization sa City Council

Iloilo City — Wala sang plano ang mga konsehal nga identified kay Mayor Joe Espinosa nga magduso sang reorganization sa city council.

Ini ang pahayag ni Councilor Ed Peñaredondo kasunod sang panghangkat ni Councilor Plaridel Nava sang nagligad nga semana nga i-reorganize ang mga komitiba sa konseho.

Suno kay Peñaredondo, wala man sila sang choice pananglitan gustuhon sang grupo nga identified kay Congressman Jerry Treñas nga magpatuman liwat sang reorganization bangud sila ang mayoriya.

Madumduman natabu ang reorganization sa city council sang nag-alyansa sa grupo ni Treñas sanday Nava kag Councilor Joshua Alim.

Nagresulta ini sa pagkakas sa posisyon kag mga komitiba nga gina-uyatan nanday Peñaredondo kag Councilor R Leone Gerochi.

Naglango-lango pa suno sa iya si Nava nga ibalik sa iya ang pagka-floor leader bangud ginpahayag may naga-intra kag may nagadikta sa iya.

Apang nagbalibad si Peñaredondo bangud komportable na siya sa iya sitwasyon kag masaku na sa iya pagpangampanya.

Nagapati ang konsehal nga may kaangtanan sa mga naga-pressure kay Nava sa desisyon niya angut sa ginahingyo nga prangkisa sang Prime Water, ang panghangkat nga mag-reorganize liwat.

Gin-athag ni Peñaredondo nga wala nakasugilanon ang ila grupo kag wala man nakaproponer si Mayor Espinosa angut sa possible reorganization sa konseho. (JoMaque)