Pinakabata nga rape victim sa syudad, 6-anyos suno sa pulis

Iloilo City — 6 ka tuig nga bata nga babaye ang pinakabata nga nabiktima sang pagpanghimulos sa syudad subong nga tuig suno sa Women and Children’s Protection Desk sa Iloilo City Police Office.

Suno kay SPO3 Ruth Laudatu sang ICPO-WCPD, tatay mismo sang tagreklamo ang ginpahayag naghimo sang krimen.

Sa data sang pulis, nagnubo sa 25 ka mga rape cases ang narecord halin Enero tubtob Nobyembre subong nga tuig ipaanggid sa 28 ka mga kaso sa amo nga period sang 2017.

Sa pihak sini, ginpahayag ni SPO3 Laudatu nga alarming sa gihapon ang amo nga numero.

‘MINORS’

Kalabanan sang mga nagreport nga nabiktima sang pagpanghimulos suno kay SPO3 Laudatu ang mga dalagita nga naga-edad 16 tubtob 18-anyos.

Kalabanan naman sang mga ginreklamo ukon perpetrators ang himata ukon abyan sang mga tagreklamo.

Na-obserbahan man nga masami man sang mga tagreklamo kag ginreklamo ang upod nga naga-inom inom antes nagluntad ang insidente.

‘MAGREPORT GILAYON’

Nagpanawagan si SPO3 Laudatu sa publiko nga magreport gilayon sa pulis angut sa krimen agud gilayon nga marespondehan.

Indi lang limitado sa mga babayi ang pagpanghimulos bangud mahimo man ini matabo sa mga lalaki.

Nagpasalig naman ang DSWD nga mabulig sa mga natungdan. (JoMaque/ATT)