GINIKANAN SANG MGA MENOR DE EDAD NGA MAKAPILA KA BESES NAGLAPAS SA CURFEW FOR MINORS ORDINANCE, MAHIMO MAPRESO SANG TUBTOB 6 BULAN

Iloilo City–Puwede mapreso sang indi magnubo sa 30 ka adlaw kag indi maglapaw sa anum ka bulan ang ginikanan sang mga menor de edad nga mapamatud-an guilty sang korte sa pagpahanugot sa ila kabataan nga menor de edad nga maglagaw sa tiun sang curfew hours nga wala sang ila supervision.

Suno kay Councilor Plaridel Nava, author sang Regulation Ordinance 2011-676 ukon ang Curfew for Minors ordinance, kun wala sang inisyatibo ang mga ginikanan nga pangitaun ang ila bata nga wala sa balay pag-abot sang curfew hours kag kun mapamatud-an nga nagpabaya sila, makabig ini nga “unimplied consent” ukon daw pareho lang nga may pahanugot nila ang paglagaw sang ila kabataan bisan pa may curfew.

Indi suno kay Nava kinahanglan nga “expressed” ang pahanugot sang ginikanan.

Gin-athag man sang konsehal nga wala nabutang sa ordinansa nga kinahanglan tatlo ka beses maglapas sa ordinansa ang menor antes kasuhan ang iya ginikanan.

Suno kay Nava sang panahon nga naga-operate sadto ang Task Force on Minors nga iya ginapamunuan, kun may mga menor nga ma-rescue sa curfew hours, gilayon sila ginadala sa DSWD, gina-contact ang mga ginikanan kag ginapamangkot sang rason kun nga-a ginpabay-an nila ang ila kabataan nga magguwa sa balay.

May witness suno kay Nava nga ginapamangkot man kag kun nagakaigo ang rason sang mga ginikanan, ginapatawad sila pero kun makita nga daw wala man sang pag-ulikid sa ila kabataan, gina-book ang mga ini.

Paathag pa ni Nava, kun sa idalum sang custody sang nanay kag tatay ang menor, pareho nga kasuhan ang ginikanan.

Ang paathag ginhimo ni Nava kasunod sang pagpasaka sang kaso sang Task Force on Moral and Values Formation sa pagpamuno ni Mr. Jorge Duron batok sa 16-anyos nga dalagita nga makapila ka beses na-rescue sa tiun sang curfew hours. Una nga bes ini nga may nakasuhan ang TFMVF.

Ginpahayag ni Duron nga ang kaso ginpasaka nila matapos na-rescue ang menor sang tatlo ka beses.

via Aksyon Hotline

(MOrtega)