Iloy nga labing una nga ginkasuhan sang Task Force on Moral and Values Formation bangud sa paglapas sang iya 14 anyos nga bata nga babaye sa Curfew for Minors Ordinance, nagakabalaka kon sin-o ang masagud sa iya kabataan kag iloy

Iloilo City–Nagakabalaka si alyas Daisy, 33-anyos sang Barangay Camalig, Jaro, kon sin-o ang masagud sang iya mga bata kag iloy matapos ginpasakaan siya sang kaso sang city government angut sa paglapas sang iya 14-anyos nga bata sa Curfew for Minors Ordinance.

Suno kay Daisy, ginalaygayan man niya si alyas Inday nga indi maglagaw ilabi na kun gab-i apang wala siya ginapamati-an. Masami nga wala nagatenir sa ila balay si Inday kag binulan ukon sinemana antes siya makapauli.

Si Inday ang ikatatlo sa pito ka mag-utod.

Nagpauli na subong si Inday sa ila balay makaligad ang halos duha ka bulan nga pagtenir sa balay sang iya nobyo.

‘ANO ANG KULANG KO?”

Nagalibog ang ulo ni Daisy kun ano ang iya kakulangan kay Inday nga gintunaan sang iya pagliho-liho kag indi pagtenir sa ila balay.

Suno sa iloy, ginahatag man niya sa iya kabataan ang ila kinahanglan kag ginapangayo sa kutob sang iya masarangan.

Hapon pa lang, nagabaligya na si Daisy sang mga utanon sa Iloilo Terminal Market kag aga na kun magpauli sa ila balay.

Nagabulig-bulig man kay Daisy sa pagbaligya ang iya live-in partner.

‘GINKASUHAN’

Gin-file kahapon, Disyembre 3, sang Task Force on Moral and Values Formation ang kaso batuk kay Daisy angut sa katatlo ka beses nga paglapas ni Inday sa Curfew for Minors Ordinance.

Sandig sa Section 11 sang amo nga ordinansa, liable man ang ginikanan sa paglapas sa ordinansa sang ila mga kabataan.

Ini ang labing una nga kahigayunan nga nagpasaka sang kaso ang Task Force sa ginikanan sang menor nga naglapas sang ordinansa.

Kun mapamatbatan guilty, mahimo mapreso si Daisy sang indi magnubo sa 30 ka adlaw kag indi maglapaw sa anum ka bulan. (AGB/ATT)