PAGPASAKA SANG KASO SA MGA GINIKANAN SANG MGA MENOR NGA PILA KA BESES NAGLAPAS SA CURFEW FOR MINORS ORDINANCE, MANGIN SIGE-SIGE NA–DURON
Iloilo City–Mangin sunod-sunod na ang pagpasaka sang kaso sang Task Force on Moral and Values Formation batok sa mga ginikanan sang mga menor-de-edad nga makapila ka beses na nga naglapas sa Curfew for Minors ordinance.
Ini ang ginpasalig ni TFMVF Head Jorge Duron kasunod sang pagpasaka sang kaso sang task force batok sa ginikanan sang 14-anyos nga dalagita nga apat ka beses naglapas sa ordinansa.
Ang 14-anyos nga dalagita nga taga-Camalig, Jaro una nga na-rescue sang Mayo 6, ala 1:30 am sa Calajunan, Mandurriao; ikaduha sang Setyembre 6 las 11 pm, sa Laguda, Lapaz, ikatatlo sang Oktubre 6, las 10:30 pm, sa Arevalo kag ikaapat nga na-rescue ang minor sang Oktubre 11 apang wala na ginlakip sa complaint sang Task Force bangud barangay tanod ang naka-rescue.
Suno kay Duron, ginatipon man nila ang iban nga record sa mga police stations kag posible nga may kasuhan pa gid sila nga mga ginikanan.
Ginpanghiwala ni Duron ang pahayag ni Councilor Joshua Alim nga nagkunol ang ila operation.
Naguba lang suno sa iya ang ila salakyan kabangdanan wala sila nakalibot.
Gin-athag ni Duron nga kada gab-i nagalibot kag nagabantay ang iya mga tinawo.
via Aksyon Hotline with a report from Aksyon Kikik Enar
(MOrtega/JoMaque)