5 ka city councilors, nagsabat sa Bill Challenge sang Aksyon Radyo bilang pamatuod nga nagabayad sila sa PECO

Iloilo City–Lima ka mga city councilors ang nagsabat sa panghangkat sang Aksyon Radyo Iloilo nga magpakita sang kopya sang ila billing sa Panay Electric Company (PECO).

Ini agud madula ang pagpati sang mga pumuluyo nga gina-libre sang PECO ang balayran sa elektrisidad sang mga konsehal sa syudad.

Ang lima ka konsehal amu sanday Councilors Ely Estante, R. Leone Gerochi, Plaridel Nava, Armand Parcon kag Joshua Alim.

Sa lima ka konsehal, si Alim pa lang ang nakahatag sang kopya sang billing pero nagpasalig man ang apat pa ka konsehal nga mahatag sila sang kopya.

Base sa initial information sang Aksyon Radyo, nagabayad sang P3,500 tubtub P5,200 kada bulan si Estante para sa ila elektrisidad samtang ginabanta sa P4,000 naman kada bulan ang ginabayaran ni Gerochi.

Naglab-ot naman sa P10, 085 ang balayran ni Alim sang Oktubre bangud singko sentimos lang sang nagligad ang electric bill sang konsehal.

Ginpahayag nga subong lang nga tuig nakabaton sang singko sentimos nga billing si Alim apang indi mapat-od kon anu nga bulan.

Sang ginpa-check ni Alim sa PECO, natukiban nga guba ang iya kuntado gani ginpa-islan rason nga nagtimbuok sa P10,000 ang iya billing sang Oktubre. (AGB)