Lalaki, ginbuno-patay sang magpakaisa sa Badiangan

Badiangan, Iloilo – Patay si David Bergante Jr., 48-anyos matapos ginpulihan buno sang magpakaisa sa Barangay Tamocol, Badiangan, pasado las-5:30 kahapon sang hapon, Disyembre 5.

Gindala pa sa ospital ang biktima apang wala gid natabangan bangud sa madamo nga kapilasan sa lawas.

Suspek sa pagpatay sa biktima ang magpakaisa nga sanday Vincent, 33; Romel, 25; kag Rodilyn Quintero, 31 nga mga residente man sang amu nga lugar.

Suno kay P/Chief Inspector Dennis Pamonag, hepe sang Badiangan Municipal Police Station, daan nga hiligut-anon ang ginasunod nga anggulo sa kapulisan sa pagpatay sa biktima.

Nagsurrender sa Badiangan Police si Vincent samtang at-large naman sanday Romel kag Rodilyn. (JoMaque)