7 bulan nga lapsag nga lalaki sa Barotac Viejo, patay matapos ginlalasan liog sang iya iloy

Barotac Viejo, Iloilo – Patay ang pito ka bulan nga lapsag nga lalaki sang ginlaslasan liog sang iya iloy pasado las-tres kaina sang hapon, Disyembre 7.

Sa imbestigasyon ni PCI Joven Arevalo, hepe sang Barotac Viejo MPS, nakabaton sila sang tawag halin sa punong barangay sang Barangay California nga nagapangayo sang bulig angut sa natabu.

Nagresponder gilayon ang mga pulis pero wala na naabtan ang lapsag bangud gindala sang iya amay sa ospital samtang ara sa guwa sang balay ang 28 anyos nga iloy.

Nagaka-urungan ang iloy suno kay Arevalo pero nagsabat man sang ginpamangkot. Ginsaysay sang iloy nga ginlaslas niya ang liog sang bata gamit ang pisaw, gingunting ang puwak kag gin-inom ang dugo. Sang ginpamangkot kon ngaa, ginsabat niya ang pulis nga nag-away sila sang iya bana bangud ginbuka sang lalaki ang iya ginbakal nga bulutangan sang mga bayo.

‘Panaysayon sang bana’
Sa dugang nga pagpangusisa ni PCI Arevalo, nagapanguha sang utanon sa likod lang sang ila balay ang 33 anyos nga bana agud nga ibaligya. (Ginabanta 20 metros ang kalayuon niya sa balay).

Nakibot ang bana sang nag-abot ang iya pito ka tuig nga bata kag naghambal nga mahulam ang iya iloy sang binangon. Kinulbaan ang bana gani nagbalik sa balay kag nakita sa lababu ang ila pito ka bulan nga lapsag nga duguon kag may dugo man sa baba ang iya asawa. Ara naman malapit sa mag-iloy ang ila isa pa ka bata nga naga-edad apat ka tuig.

‘Wala man sang balatian’
Ginpabutyag sang bana nga wala man siya nakahibalo nga may problema sa paminsaron ukon balatian ang iya asawa suno kay PCI Arevalo.

Pero na-obserbahan sang bana nga daw indi makatulog ang iya asawa kagab-i. Antes sini, nagpauli sa San Rafael ang asawa kag nanugid man ang ugangan sang lalaki nga nanotisyahan nila nga daw indi mapahamtang ang babaye.

Ara sa custody sang Barotac Viejo police ang asawa samtang ginahulat ang desisyon sang bana kon pasakaan sang kaso ang babaye.

Ang iloy, may duha ka kabataan sa iya una nga bana kag may tatlo ka bata sa iya ikaduha nga bana. (AGB)