MAG-ASAWA, GINPASAKAAN KASO BANGUD SA PAGLAPAS SA CURFEW FOR MINORS ORDINANCE SANG ILA 15-ANYOS NGA BATA

Iloilo City — Ginpasakaan kaso angmag-asawa sa Barangay Concepcion, City Proper sa paglapas sa Curfew for Minors Ordinance sang ila 15-anyos nga solterito nga bata.

 Suno kay Task Force on Moral and Values Formation head Jorge Duron, tatlo ka beses na nga na-rescue sa curfew hours angGrade 10 student nga si alyas Nonoy.

Sandig sa Section 11 sang ordinansa, liable ang ginikanan kun ma-rescue ang ila menor de edad nga kabataan halin 10:00 P.M. tubtob 4:00 A.M.

149 NA ANG SECOND OFFENDERS

149 na ang mga second offenders sa 949 ka mga menor nga narescue sa curfew hours sa syudad halin Enero tubtob Nobyembre subong nga tuig.

Suno kay Duron, kun maglapas pa gid sa ordinansa ang natungdan nga mga menor,gilayon nga pasakaan kaso ang ila mga ginikanan.

Una na ginpasakaan kaso sang personnel sang Task Force ang iloy sang 14-anyos nga dalagita angut sa paglapas sa Curfew for Minors Ordinance.

Kun mapamatbatan nga guilty, mahimo mapreso ang mga ginikanan sang 30 diyas tubtob anum ka bulan. (JoMaque/AT)