Bana sa Barotac Viejo, nagapangayo bulig agud mapabulong ang iya asawa nga nagpatay sang ila 7 bulan nga bata nga lalaki paagi sa paglaslas sang leog kag gin-inom pa ang dugo

Barotac Viejo, Iloilo (UPDATE) – Wala sang plano ang 33 anyos nga si alyas Bongbong nga pasakaan sang kaso ang iya asawa nga si alyas Fritz, 28, nga nagpatay sa ila pito ka bulan nga bata nga lalaki paagi sa paglaslas sang leog, pag-gunting sang puwak kag gin-inom pa ang dugo.

Sa baylo, nagapangayo sang bulig si Bongbong sa pamilya sang iya asawa kag sa iya pamilya nga mapatan-aw sa doktor si Fritz agud mabulong kon may balatian gid man.

Una na nga ginpahayag ni PCI Joven Arevalo, hepe sang Barotac Viejo MPS, nga posible gin-atake sang nerbyos ang babaye. Sa impormasyon nga nakalab-ut sa hepe, may utod man si Fritz nga may nerbyos.

‘Panaysayonsang iloy’

Indi luyag ni Fritz nga patyon ang iya bata. Sa interview sang Aksyon Radyo kahapon sang aga, Disyembre 8, ginpahayag ni Fritz nga napatay niya ang iya bata bangud sa kagutom kag kauhaw.

Suno sa iya, ginhakwat niya ang bata kag ginpahigda sa lababu. Nagkuha siya sang pisaw ukon surot kag ginggulgol ang lapsag. Gin-ako niya nga ginsuyop ang dugo bangud nauhaw siya.

Nagpahayag man si Fritz nga nahimo niya ang pagpatay bangud sa kakulba pero wala gid niya nasugid kon ano ang iya ginakulbaan.

Nagapabilin sa custody sang Barotac Viejo police si Fritz. (JoMaque) via Aksyon Firingline