Mga pulis nga gin-relieve sa Anilao MPS matapos nadakpan nga tulog sa surprise inspection ang on-duty personnel, gin-assign sa RPHAU

Iloilo City — Gin-assign sa Regional Holding and Accounting Unit ukon RPHAU ang mga pulis kalakip ang hepe sang Anilao Municipal Police Station matapos naabtan nga nagatulog sa duty sang gin-inspeksyon sang National Police Commission ang police station sang Huwebes sang kaagahon, Disyembre 6. 

Suno kay Iloilo Police Provincial Office Director Senior Supt. Marlon Tayaba, gin-disarmahan kag natalana ipaidalum sa retraining ang mga gin-relieve nga pulis.

Nagkuha suno sa iya ang IPPO sang personnel sa Mobile Force Company sa Tigbauan kag Sara agud i-assign sa Anilao Police Station.

 Ginbulos nga bag-o nga hepe sang Anilao si Chief Inspector Ciriaco Esquiliarga halin sa Batad.  

Una na gin-ako sang gin-relieve nga si hepe, Senior Inspector Menrico Candaliza nga daku nga kapaltahan ang ila ginhimo apang nagdepensa siya nga wala siya nagakatulog kundi mga tinawo niya ang napiyungan.

Ginpabutyag naman ni IPPO Director Tayaba nga seryoso siya nga pasabton ang mga pulis nga may kakulangan sa ila responsibilidad. (JoMaque)