(UPDATE) Bana sang 28 anyos nga iloy nga nagpatay sa iya 7 bulan nga bata nga lalaki sa Barotac Viejo, may psychiatric issue man sadtu suno sa Municipal Health Officer

Barotac Viejo, Iloilo--May psychiatric issue man sadto si alyas Bongbong, 33-anyos sang Barangay California, Barotac Viejo, nga bana sang 28-anyos nga iloy nga nagpatay paagi sa paglaslas sa liog kag nagsuyop pa sa dugo sang ila pito ka bulan nga lapsag.

Ini ang ginkunfirmar ni Dr. Joan Sueta, Municipal Health Officer sa LGU Barotac Viejo.

Suno kay Dr. Sueta, nadiskubrehan niya sa kapid ni Bongbong nga gina-follow up sadto si Bongbong sang psychiatrist.

Tatlo ka tuig na sang nag-untat inom sang bulong si Bongbong.

Ginpahayag ni Dr. Sueta nga kinahanglan nga mahibaluan ang status subong ni Bongbong agud gilayon man nga mabulong kun kinahanglan.

Ginakuhaan pa sang Aksyon Radyo Iloilo sang pahayag si Bongbong lakip ang iya pamilya.

‘COUNSELLING’

Ipaidalum sa counselling sanday Bongbong kag ang apat ka tuig niya nga bata nga nakakita sa ginhimo nga krimen sang iya iloy.

Suno kay Dr. Sueta, wala pa natul-id kun ano kadugay ang counselling sa pagpanguna man sang social worker sa ila banwa.

‘NAKA-GAID’

Gin-refer sa Psychiatric Ward sang Western Visayas Medical Center ang asawa nga si alyas Fritz kahapon, Disyembre 10.

Suno kay alyas Inday nga utod ni Bongbong, ginahigtan ang magtimbang nga kamot kag tiil ni Fritz bangud nagawaras siya.

Dugang niya, wala man nagasinanto ang ginapanghambal ni Fritz. (AGB/ATT)