Iloilo City – Nagpaathag si Councilor Plaridel Nava, chairman sang Committee on Public Utilities sa City Council, sa pag-aprubar sa franchise application sang Prime Water nga ginapanag-iyahan sang Villar Group para mag-distribute sang tubig sa syudad.

Suno kay Nava, ginsandigan nila ang Section 458 sang Local Government Code nga may poder ang local government unit (LGU) nga mag-grant sang franchise sang applicant para sa water distribution.

Magluwas diri, nagapati man ang apat ka mga abogado nga konsehal ngaginabug-usan nanday Councilors Nava, Joshua Alim, Ed Peñaredondo kag R. Leone Gercohi nga may poder sila nga mag-grant sang franchise. Base naman sa position paper nga ginsumiter sang City Legal Office, may otoridad man ang city council nga maghatag sang franchise.

Ginklarosang konsehal nga application for water distribution ang ginapangayu sang Prime Water kag indi water right.

Ang water right suno sa iya, ginahatag sang National Water Resources Board agud maka-explore ukon maka-exploit ang applicants apang indi ini ang ginapangayu sang Prime Water.

Apang i-regulate ang Prime Water sang NWRB. Nagakadapat man suno kay Nava nga magkuha sang water right kag iban pa nga permit ang Prime Water sa amu nga ahensiya pareho sa ginhimo sang South Balibago Water Resources para sa ila operation.

Sa session kahapon, Disyembre 11, gin-aprubahan sang City Council ang franchise application sang Prime Water. (JoMaque)