Mga cause oriented groups, nagwangal matapos naglapta sa syudad ang mga posters nga naga-angut sa ila sa CPP-NPA-NDF; grupo nga Karapatan, nagapati nga kahimuan sang Duterte administration ang pagpalapta sang posters

Iloilo City--Wala na sang iban nga posible magpakalain sa grupo nga Karapatan, Bayan kag National Union of People’s Lawyers (NUPL) kundi ang Duterte administration sa bulig sang Armed Forces of the Philippines kag Philippine National Police.

Suno kay Mr. Reylan Vergara sang Karapatan, luyag ni Duterte nga magtukod sang Duterte Death Squad agud lagson ang NPA members kag ila supporters.

Pero suno kay Vergara, ang Karapatan kag NUPL, wala sang ginahimo nga krimen ukon kahalitan sa pumuluyo.

Ang ila grupo suno kay Vergara, gintukod santu sa constitutional rights para makapalab-ut sang mga hibubun-ot.

Gin-athag ni Vergara nga indi sila konektado sa NPA kag ang ila grupo gintukod nga legal.

Kuntani suno sa iya, sabton lang sang gobyerno ang mga issue nga ginapalab-ut sang pumuluyo pero ang masubo bangud kabuhi ang ginakuha.

Kun may problema sa ila, kuntani suno kay Vergara, pasakaan sila sang kaso sa korte.

Ang pahayag ginhimo ni Vergara kasunod sang paglapta sang mga posters nga nagapahayag nga pabudlay sa masa ang CPP-NPA-NDF kag gintawag sila nga kampon sang amo nga mga organisasyon kag ginlakip pa ang ila pictures.

Ang mga abogado naman sang NUPL, gintawag nga abogado sang mga terorista sa mga posters nga ginpahayag iya sang Panay Alliance of Victims of the CPP-NPA-NDF. (AGB/MO)