MIWD, mapasaka kaso sa city council bangud sa pag-aprubar sa franchise application sang Prime Water agud mag-distribute sang tubig sa Iloilo City

Iloilo City – Ginapanindugan sangMetro Iloilo Water District (MIWD) nga wala sang otoridad ang local government unit (LGU) sa pag-grant sang franchise para sa water distribution.

Ini matapos nga gin-aprubahan sang City Council ang franchise application sang Prime Water nga ginapanag-iyahan sang Villar Group agud mag-distribute sang tubig sa syudad sa ila session kahapon, Disyembre 11.

Suno kay Atty. Roy Villa, corporate legal officer sang MIWD, wala sang otoridad ang LGU sa pag-grant sang franchise bangud katungdanan ini sang national government.

Bilang tikang suno kay Villa, mapasaka sang kaso ang MIWD batuk sa siyudad bangud nagalapas sa Constitution ang tikang sang konseho. Ginatipon na sang MIWD angmga dokumento lakip ang kopya sang ordinansa nga gin-aprubahan sang konseho agud makapasaka sila sang kaso.

Gina-uyatan sang MIWD suno kay Villa ang ruling ang Supreme Court nga wala sang poder ang LGU sa pag-grant sang franchise sa water distribution.

Bisan suno sa iya ang Department of Interior and Local Government (DILG) ang naghambal nga wala man sang poder ang LGU.

Una na ginpahayag ni Councilor Plaridel Nava, chairman sang Committee on Public Utilities sa City Council, nga ila ginsandigan ang Section 458 sang Local Government Code nga may poder sila sa pag-grant sang franchise para sa water distribution. (JoMaque)