Conveyor mechanic sa planta sang softdrinks company sa Pavia, gintiro; biktima napilasan sa butkon

Pavia, Iloilo— Napilasan sa wala nga butkon ang conveyor mechanic sang planta sang softdrinks matapos gintiro sang suspek nga nakasakay sa motorsiklo sa Brgy. Ungka 2, Pavia kaina sang aga, Disyembre 15.

Suno kay PO1 Jan-Jan Serra, imbestigador sang Pavia MPS, nagbakal sang kape sa tiangge si Jonel Ferrer, 36 sang Nueva Valencia, Guimaras. Apang sang pabalik siya, ginsundan siya sang suspetsado kag gintiro sang makatatlo ka beses.

Wala makilala sang mga testigo ang suspek bangud naka-helmet kag naka-jacket.

Na-recover sa crime scene ang tatlo ka basiyo sang ginapatihan .45 caliber nga pusil.

Ginapatihan sang Pavia police nga daan nga hiligut-anon ang motibo sa insidente apang padayon pa ang ila imbestigasyon. (AGB)