Mga konsumidor mahimo magpatakod sa water distribution utility nga luyag nila – MIWD legal counsel

Iloilo City – Mahimo magpatakod angmga konsumidor sa water distribution utility nga luyag nila bangud sang posible pag-overlap sang operation sang Metro Iloilo Water District kag iban pa nga mga pribado nga mga kumpaniya.

Ini suno kay Atty. Roy Villa, legal counsel sang MIWD.

Sakop sang operation sang MIWD ang syudad kag pito ka mga banwa sa probinsya.

Bilog man nga syudad ang scope of operation sang Prime Water samtang Jaro ang sa South Balibago Resources Inc.

Dugang diri, ginadihon man ni Councilor Plaridel Nava, chairman sang Committee on Appropriations, ang paghatag sang prangkisa sa Manila Water sa pag-operate sang water source system sa Arevalo, Molo kag Mandurriao.

Wala pa nakadesisyon ang korte sa ginpasaka nga kaso sang MIWD kay Mayor JoeEspinosa kag mga konsehal nga nagpabor sa paghatag sang prangkisa sa South Balibago Resources Inc.

‘UNFAIR’

Ginpabutyag ni Atty. Villa nga unfair sa ila ang paghatag prangkisa sang city government.

Illegal ang operation sang natungdan nga mga kumpaniya suno kay Atty. Villa bangud ang National Water Regulatory Board ukon NWRB lang ang may otoridad sa paghatag sang prangkisa natuhoy sa water rights.

Sang damlag lang, ginpirmahan sang MIWD kag Metro Pacific Investment Corporation ang P12.3- Billion Joint Venture Agreement sa pag-upgrade kag pagpakay-o sa serbisyo sang water distribution utility. (JoMaque/AT)