MIWD, ginapreparar na ang ipasaka nga kaso batuk sa mga opisyal sang city government nga nagpabor sa paghatag franchise sa prime water

Iloilo City – Mapasaka ang Metro Iloilo Water District sang kaso batuk sa mga opisyal sang city government nga nagpabor sa paghatag franchise sa Prime Water Infrastructure Corp agud mag-distribute sang tubig sa syudad.

Suno kay Atty. Roy Villa, legal counsel sang MIWD, ginapreparar nila ang mga dokumento sa pagpasaka sang criminal charges nga usurpation of authority or official function kag paglapas sa Anti- Graft and Corrupt Practices Act batuk kay Mayor Joe Espinosa kag mga konsehal nga nagpabor sa paghatag sang prangkisa.

Grave abuse of authority kag grave misconduct naman ang ipasaka nga administrative charges batuk sa mga natungdan.

 Ginatun-anman sang MIWD ang kaso angut sa election laws nga mahimo ipasaka bangud nagahilapit ang eleksyon.

Isa lang ang political party sang alkalde, kadam-an sang mga konsehal nga nagpabor sa paghatag sang franchise kag ni senator Cynthia Villar nga nagapanag-iya sang kumpaniya suno kay Atty. Villa.

‘MAPASAKA LIWAT’

Nanindugan si Atty. Villa nga mapasaka liwat sang kasubong nga mga kaso ang MIWD sa natungdan nga mga opisyales sang city government angut sa ginapa-abot paghatag prangkisa sa Manila Water Philippine Ventures sa pagconstruct, establish, commission, operate kag maintain sang water supply sa Mandurriao, Molo kag Arevalo.

2017 pa sang nagpabutyag sang interest ang Manila Water nga magnegosyo sa syudad kasunod sang paghatag sang prangkisa kag pagsulod sa Memorandum of Agreement sa tunga sang city government kag South Balibago Resources Inc sa pagdistribute sang water supply sa Jaro.

Una na nagpasaka sang kaso ang MIWD batuk kay Espinosa kag sa mga konsehal nga nagpabor sa paghatag sang prangkisa sa South Balibago Resources, Inc..

‘HULATON ANG DESISYON SANG KORTE’

Nanindugan si Councilor Plaridel Nava, floor leader sa city council kag chairman sang Committee on Public Utilities, nga ang korte lang ang makadesisyon kun may kinamatarong ang city government sa paghatag sang prangkisa angut sa pagdistribute sang tubig sa syudad.

Samtang wala pa sang desisyon, gina-presume nga regular ang pag-akomodar sang transaksyon suno kay Nava sandig sa Local Government Code.

Nanindugan naman si Atty. Villa nga may mga desisyon na ang Korte Suprema angut sa kwestyon sa otoridad sang LGU sa paghatag sang prangkisa.

Pinakaulihi suno sa iya ang Batangas City versus Philippine Shell Petroleum Corporation kag Shell Philippines Corporation nga gin-issue sang Hunyo 7, 2017.

Sa desisyon sa amo nga kaso, wala sang otoridad ang LGU sa paghatag sang prangkisa angut sa water resources suno kay Atty. Villa. (JoMaque/AT)