DLS Supermart sa Janiuay kag 2 pa sini ka branches, ginsiraduhan bangud sa kapaslawan sang tag-iya nga magbayad sang insakto nga buhis

Iloilo — Nakibot ang manager sang DLS Supermart sa Janiuay sang nag-abot ang mga katapo sang Bureau of Internal Revenue (BIR) kag kapulisan upodang pila ka katapo sang media agud siraduhan ang nasambit nga establishimento mga las 10:30 kaina sang aga, Disyembre 17.

Bilang kabahin sang OPLAN KANDADO sang BIR, ginkandaduhan ang establishimento sa pagpanguna ni Dr. Alberto Olasiman, regional director sang BIR Region 11.

Natukiban nga halin sang 2016, wala nagabayad sang insakto nga buhis ang tag-iya sang DLS SUPERMART nga si Darius Omapas, gani ginpa-idalum ini sa 10 day-surveillance sang Setyembre subong nga tuig.

Oktubre 10 ginhatagan sang 48 hours ang tagdumalahan sang establishimento agud mag-comply sang kinahanglanon nga requirements  apang napaslawan sila nga maka-submit.

Oktubre 29 sang ginhatagan pa gid sang 5 day-grace period ang establishemento agud kompletuhon ang ila dukumento kag makabayad sang ila tax deficit, pero wala gihapon sila maka-comply rason nga gin-operate sang BIR.

Mga alas 11 na kaina sang aga sang nasiraduhan ang establishimento kag nagpa-uli na lang ang mga empleyado.

 Magluwas sa Janiuay, ginsiraduhan pa gid ang branch sang DLS Supermart sa Pototan kag Tagbak, Jaro. (JoMaque/KT)