P25,000 nga promisa ni Mayor Joe Espinosa nga bonus sang mga regular employees sang city hall, nahimo na lang nga P15,000 –Councilor Plaridel Nava

Iloilo City – Wala naghisugot ang Finance Committee kag Office of the Mayor sa P25,000 nga Christmas bonus sang mga regular nga empleyado sang City Hall.

Suno kay Councilor Plaridel Nava, chairman sang Committee on Appropriations sa City Council, P10,000 lang imbes P20,000 nga Collective Negotiation Agreement (CNA) incentive kag P5,000 nga Productivity Enhancement Incentive ang mabaton sang mga regular nga empleyado.

Ginaduso kuntani ni Mayor Joe Espinosa nga source of fund ang P85-Million sa supplemental budget nga wala nagamit. Apang nagpamalabag ang Finance Committee sa hingyu sang alkalde bangud posible nga kwestiyunon ini sang Commission on Audit (COA).

Nalakip ang PEI kag CNA sa supplemental budget number 4 nga P60-Million. Indi na pwede nga makapasar sang ika-lima nga supplemental budget ang city council bangud magalapas ini sa kasuguan.

Una na nga gin-anunsyar ni Mayor Espinosa kag City Administrator Atty. Hernando Galvez nga P25,000 ang mabaton nga bonus mga regular nga empleyado. (JoMaque)