2 stray bullet incidents, narecord sa probinsya sang Iloilo sa tion sang New Year celebration

Iloilo — Duha ka stray bullet incidents ang narecord sa probinsya sa tion sang New Year celebration.

Nakibyasan sa ulo ang 59 anyos nga babaye sang naigo sang stray bullet sa Aquino Nobleza West Street, Janiuay las 12:40 kaina sang kaagahon, Disyembre 31.

 Nagalantaw sang fireworks sa guwa sang ila balay si Magdalena Dulce sang naigo sang nagtalang nga bala. Gindala sa Janiuay District Hospital ang biktima kag ginpaguwa man sa ospital matapos nadapatan sang first-aide.

Narecover sa lugar ang deformed slug sang wala pa natumod nga kalibre sang pusil.   

Samtang, napilasan sa tangkugo kag likod sang lawas ang 15-anyos nga lalaki sang naigo sang bala sang bird shot nga shotgun sa Brgy. Subog, Maasin sang Disyembre 31 sang gab-i.

Ginkilala ang biktima kay alyas Julius nga padayon nga ginabulong sa Federico Ramon Tirador Sr Memorial District Hospital.

Suno kay Inspector Oswald Gatuslao, acting Chief of Police sang Maasin PNP, indi pa nila mahibaluan kun ano gid ang natabo apang posible nga may nagpalupok sang bird shot nga shot gun malapit sa balay sang menor-de-edad.

Ginpahayag ni Gatuslao nga naglubong sa panit ni Julius ang bala sang bird shot shotgun. Nakagwa naman sa District Hospital si Julius. (JoMaque)