37-anyos nga lalaki, arestado matapos ginreklamo nga nagpalupok sang pusil

Mandurriao, Iloilo City — Arestado ang 37-anyos nga lalaki matapos ginreklamo nagpalupok sang pusil sa Barangay Hibao-an Norte, 12:30 kaina sang kaagahon, Enero 1.

Suno sa witness nga si alyas Mae, nagalantaw sila sang mga palupok sa guwa sang ila balay sang hinali lang nagpalupok sang pusil si Stewart Mirasol, pumuluyo sang amo nga lugar.

Naga-inom si Mirasol upod ang iban pa gid malapit sa lugar antes siya ginpahayag nagpalupok sang pusil.

Gilayon naman nga nagresponde ang mga personnel sang Iloilo City Mobile Force Company kag gindakop si Mirasol.

Sa report sang Mandurriao police, narecover sa ginreklamo ang isa ka 9 mm caliber revolver (black widow) nga wala sang serial number kag lima ka baseho sang 9mm caliber.

Wala sang may napakita nga mga dokumento si Mirasol angut sa pusil suno sa pulis. Wala naman sang may napilasan kasunod sang insidente.

Nagpamalibad nga maghatag sang pahayag si Mirasol. (JoMaque)