PO3 Federico Macaya nga nagreklamo batuk sa mag-amay nga Guimbal Mayor Oscar Garin kag Congressman Richard Garin, ginpahayag nakabaton sang pamahug

Iloilo City— Handa si Police Regional Office 6 Director Chief Supt. John Bulalacao nga hatagan sang proteksyon si PO3 Federico Macaya Jr matapos ginpahayag nakabaton sang pamahog sa kabuhi.

Wala pa sang nabaton nga report si Bulalacao angut sa ginpahayag nga pamahug sa pulis.

Nagapati naman si Bulalacao nga responsable nga political leaders ang mag-amay nga Guimbal Mayor Oscar Garin kag Congressman Richard Garin. Ginreklamo ni Macaya nga ginsiko, ginsipa, gintampa, ginduplaan kag ginpalukpan siya sang pusil ni Congressman Garin samtang ginatayaan man siya sang pusil ni Mayor Garin sang Disyembre 26, 2018.

Ginpabakasyon naman ni Bulalacao si PO3 Macaya agud hatagan siya sang panahon nga maka-recover sa trauma pagkatapos sang natabu sa iya.

Suno kay Bulalacao, sa Enero 7 pwede na niya i-require si Macaya nga magtrabaho sa police station nga luyag sang pulis.

Una na ginhingyo ni Macaya nga indi na niya luyag nga magbalik sa Guimbal Police Station. (AGB)