Coast Guard El Nido, padayon ang search operation sa Ilonggo seaman nga nadula samtang nagalayag ang ila barko sa West Philippine Sea

Palawan (UPDATE) – Nagapadayon ang pagpangita sang mga katapo sang Philippine Coast Guard-El Nido sa Ilonggo seaman nga nadula samtang nagalayag ang ila barko sa West Philippine Sea sang Disyembre 26, 2018.

Suno kay ENS Harvey Marmol, station commander sang Coast Guard-El Nido, ginmanduan sila sang central office nga maghimo sang search operation kay Lude Mar Legario, 25 sang Barangay Walang, Lambunao.

Negatibo ang resulta sang pagpangita suno kay Marmol kag wala pa man sila nakahibalo kon ano gid ang natabu kay Legario.

Nagpangayo sang bulig ang pamilya ni Legario matapos nga gindeklarar nga ‘man overboard’ ang Ilonggo seaman.

Una na nga ginpabutyag sang utod ni Legario nga si Hizzle Paguntalan nga Disyembre 27 na sila ginpahibalo sang kompaniya sa natabu sa iya utod.

Wala sang may nakahibalo kun nahulog, naglumpat ukon may nagtiklod kay Legario suno kay Paguntalan samtang nagalayag ang ila barko nga Songa Breeze sang Seacrest Maritime Shipping Company sang Disyembre 25, las sais sang gab-i. (JoMaque)