Designer, nagsabat sa reklamo sang iya kliyente angut sa ginpahayag wala mahuman nga wedding gown

Iloilo City (UPDATE) – Ginpanginwala sang fashion designer nga si Melvin Aranga, 22 sang San Rafael, Iloilo, ang ginpa-blotter sang iya kliyente nga wala mahuman ang wedding gown nga ginpatahi sa iya.

Suno kay Aranga, June 2018 sang nag-transaksyon sa iya si Rhea Perion (sang Airport, Mandurriao) nga mapatahi sang wedding gown kag 16 ka bayo para sa miembro sang iya entourage sa package nga balor P40,000. Royal blue ang motif sang entourage sa budget nga P30,000 kag cream white naman ang wedding gown nga may budget nga P10,000.

Nag-amat-amat bayad si Perion tubtob naimpas sang Nobyembre.

Las-siete sa gab-i sang Disyembre 29 antes ang kasal sa Disyembre 30 suno kay Aranga, gin-deliver niya ang wedding gown kag 16 ka bayo para sa entourage. Pero nagreklamo ang bride bangud wala niya nagustuhan ang wedding gown kag wala pa matapos.

Pa-athag naman ni Aranga, indi pa fixed ang wedding gown bangud wala pa matakud ang zipper kag posible may adjustment pa sa bride. Ginpabutyag ni Aranga nga handa man siya mag-disponer kon may adjustment nga himuon pero nagbalibad si Perion kag ginpahayag nga luyag niya ibalik ang mga bayo kag ibalik sa iya ang P40,000.

Nasuksok man suno kay Aranga ang bayo para sa entourage. Ginpabutyag pa sang designer nga gusto niya ibalik ang budget para sa wedding gown pero indi magpasugot si Perion bangud luyag niya nga bilog nga P40,000 ang ibalik. Konsultahon ni Aranga ang iya abogado kon ma-file sang kaso batuk kay Perion matapos nga ginpa-blotter siya sa Mandurriao Police Station. (JoMaque)