Ilonggo seaman, nakaluwas sang nasunog ang ila barko sa kadagatan sang Hawaii

Dumangas, Iloilo— Nakaluwas ang Ilonggo seaman nga una gin-report missing matapos nasunog ang ila barko nga Sincerity Ace sa Pacific Ocean sang New Year’s eve.

Gin-confirmar ni Pedro Depositario sang Barangay Bolilao, Dumangas nga na-rescue ang iya bata nga si Verney Depositario. Suno kay Pedro, nagtawag sa iya ang ila paryente nga nagpatigayon kay Verney nga makasakay nga isa siya sa mga na-rescue kag luwas na ang iya bata.

Base sa impormasyon nga nakalab-ot sa amay, naglumpat sa barko ang iya bata upod ang chief engineer kag duha ka oiler sang barko.

Dugang pa niya nga base man sa mga pictures nga kuha samtang ginarescue ang mga crew sang barko, nakita niya nga isa sa mga gin-rescue ang iya bata.

May 21 ka crew ang Panamanian vessel kag car carrier nga Sincerity Ace nga padulong sa Hawaii halin sa Japan sang nasunog sa kadagatan nga sakop na sang Hawaii.

Una ginreport nga 16 ang na-rescue kag lima ang missing nga crew matapos naglumpat.

Si Verney ang ika-anum sa pito ka mag-ulutod. April 2018 sang nagsakay siya sa barko kag manaog na kontani subong nga Enero. (AGB/KJT)