ArchivesLokal

Lalaki, ginbuno sang live-in partner sang babaye nga iya gin-updan sa Iloilo

Iloilo— Napilasan sa tuo nga braso ang 26 anyos nga lalaki matapos nga nabun-an sang live-in partner sang babaye nga iya gin-updan.

Natabu ang insidente sa isa ka banwa sa Iloilo las-7:30 kaina sang aga, Enero 3, 2019.

Suspek ang 35 anyos nga driver sang delivery van. Konduktor naman sa bus sa Cavite ang biktima.

Sa pagpangusisa sang police, taga-Iloilo ang 39 anyos nga babaye samtang taga-Cavite ang iya live-in partner kag ang biktima.

Ginpa-istar sang mag-live-in sa ila balay sa Manila ang biktima bangud nga family friend siya sang suspek. Pero sang Disyembre 31, nagpauli sa Iloilo ang babaye kag ginhagad niya ang 26 anyos. Nabilin naman sa Manila ang live-in partner sang babaye.

Nagapamahaw kaina sang aga ang babaye kag biktima sang nag-abot ang suspek nga may bitbit nga ice-pick kag screw driver. Ginkomprontar sang suspek ang biktima kon ngaa nag-upod sa iya live-in partner sa Iloilo. Suno pa sa imbestigador sang police station, ginpamangkot pa sang suspek ang biktima sang ‘Bakit mo ako inahas’ antes ini ginbuno.

Indi naman seryoso ang sitwasyon sang biktima nga nagdesisyon nga mabalik na lang sa Cavite. Ang biktima, may live-in partner man nga nagabusong sa pagpangusisa sang police.

Wala na sang plano nga mag-file sang kaso ang biktima. (AGB/FE)

Leave a Reply