Pamilya sang bride sa Mandurriao, mapasaka kaso sa designer sang wedding gown nga wala mahingagaw human bisan nabayaran na; designer, nanindugan nga na-deliver niya ang wedding gown

Iloilo City— Desidido ang pamilya sang bride sa Brgy. Airport, Mandurriao nga kasuhan ang designer sang wedding gown nga wala naghingagaw human sang bayo bisan nga nabayaran na.

Ginhambalan ni Gloria, iloy sang bride nga si Rhea, si Melvin Aranga alyas Love Joy sang San Rafael nga makit-anay na lang sila sa korte bangud sa pagtonto sa ila.

Gin-akusahan sang iloy si Melvin nga naggasto sang ila ginbayad nga kuwarta gani nabutang sa ital-ital ang iya bata. Suno sa iloy, may pamatuod siya nga nag-ako si Melvin nga nagasto niya ang kuwarta.

Suno pa kay Gloria, imbes nga mangayo sang pasaylo, sila ang ginpaguwa ni Melvin nga malain bangud sang gin-post niya nga mga litrato sa Facebook kag naga-claim nga na-deliver niya ang wedding gown kag bayo sang entourage.

Sa pagkamatuod suno kay Gloria, Disyembre 30 ang kasal pero Disyembre 29 sang gab-i na nagpakita si Melvin kag gindala ang suno sa iya mga “rabut-rabut” nga bayo nga wala niya mahibaluan kon diin ginkuha sang designer.

‘Atubangon ang kaso’

Handa naman si Melvin nga atubangon ang kaso nga ipasaka sang pamilya sang bride batuk sa iya.

Ginapanindugan ni Melvin nga na-deliver niya ang mga bayo kag siya mismo ang nagtahi.

Suno kay Melvin, unfair para sa iya nga ibalik pa ang P40,000 nga ginbayad bangud nasoksok man ang mga bayo sa kasal kag kanugon man sang iya effort sa pagtahi. (AGB/MO)