CENRO Iloilo, may paathag sa pagdagsa sang mga pispis nga nagahapon sa mga kable sang kuryente malapit sa Atrium

Iloilo City— Perwisyo sa publiko nga nagalabay malapit sa Atrium mall ang madamo nga mga pispis nga nagahapon sa kable sang kuryente sa lugar sa ti-on sang kagab-ihon bangud sang iti nga ila ginabilin nga nagatuga sang tuman ka baho sa mga nagalabay.

Suno kay Engr. Engr. Noel Hechanova, City Evironment and Natural Resources Office (CENRO) Head, pila ka mga rason amu ang kakulangan sang kahoy nga mahimo hapunan sang mga pispis pag-abot sang kasisidmon.

Magluwas diri, posible man nga matawhay ang lugar para sa ila bangud sang mataas nga view agud mahapos sila nga makakita sang ila kalan-on kag ang mga insekto nga naga-amag sa mga streetlight ang ila ginakaon. Posible man suno sa iya nga ang electromagnetic field sa mga wiring ang gina-amag sang mga pispis para magpainit sa ila lawas.

Ikonsulta pa sang CENRO sa mga stakeholders kon ano ang pwede nila nga himuon agud mapahagan-hagan ang ini nga problema bangud indi man pwede nga pamatyon ang mga pispis. (AGB/KJT)