Councilor Joshua Alim, suportahan ang mag-move agud i-override ang pagline veto ni Mayor Joe Espinosa sa 2019 Budget Ordinance

Iloilo City (UPDATE) — Masuporta si Councilor Joshua Alim kon may mag-move sa City Council agud i-override ang pag-line veto ni Mayor Joe Espinosa sa 2019 Budget Ordinance.

Posible suno kay Alim nga magaduso sang override si Councilor Plaridel Nava, chairman sang Committee on Appropriations.

Kon matabu, iduso ni Alim ang nominal voting agud mabatian ang paathag sang kada konsehal kon pabor sila ukon indi sa veto sang alkalde.

Gin-ako ni Alim nga posible indi magmadinalag-on ang override bangud kulang sa numero ang mga magaboto sang pabor kon basehan ang linyahanay sa konseho.

10 ang kinahanglan nga boto agud ma-override ang veto ni Espinosa pero anum lang ang konsehal nga kaalyado ni Congressman Jerry Treñas. Bisan maupod sila ni Nava, mapierde gihapon sila suno kay Alim.

Nagapati si Alim nga indi malayo nga may magbag-o nga pinsar sa anum pa ka konsehal nga kaalyado sang alkalde.

(SOLACITO)