Fact finding committee sang WVSU, ginausisa kun nasumiter gid man sa DOH-6 ang ginpahayag certificate of indigency ni WVSU-MC medical center chief Dr. Ramon Guerra Jr

Iloilo City (UPDATE) — Gina-usisa pa sang fact finding committee sang West Visayas State University (WVSU) kun nasumiter gid man sa Department of Health (DOH) 6 ang ginpahayag certificate of indigency ni Dr. Ramon Guerra Jr., medical center chief sang WVSU-Medical Center para maka-avail sang medical assistance.

Suno kay Dr. Luis Sorolla Jr., presidente sang WVSU, wala pa niya nakita ang amo nga certificate kag ginapatihan nasumiter na ini sa DOH 6 base man sa report sang fact finding committee sang eskwelahan.

Una na ginpahayag ni Dr. Remia Nacanaynay, medical asssistance program coordinator sang DOH-6 nga wala ginasumiter sa ila opisina ang certificate of indigency sa baylo ang fund utilization report lang sang natungdan.

Base sa report sang fact finding committee, nakakuha sang certificate of indigency si Dr. Guerra sa DSWD office sa San Jose, Antique apang ginpanginwala naman ini sang DSWD-6.

(SOLACITO)