Man-ug, gintudlo rason sang pag-brownout sang 90 porsyento sang Panay suno sa NGCP

Iloilo City— Ginkumpirmar ni Michelle Vicera, regional corporate communication and public affairs officer sang National Grid Corporation of the Philippines (NGCP), nga bangud sa man-ug nagka-problema ang ila planta nga gintunaan sang brownout sa 90% sang isla sang Panay kaina sang kaagahon, Enero 4, 2019. 

Suno kay Vicera, nakasulod ang man-ug sa ila equipment ukon distribution line sa ila substation sa Dingle kag pagka-kuryente sini ang rason nga nag-trip off ang ila circuit breaker. 

Gin-aku niya nga nadugayan nga makabalik ang linya sang kuryente bangud ginpangita pa ang ginhalinan sang pag-trip-off. 

Lakip sa naapektuhan suno sa iya ang linya sang Panay Electric Company (PECO), Ileco 1, portion sang Ileco 3, GUIMELCO, ANTECO, CAPELCO, kag AKELCO. 

Nagbalik sa normal ang supply sang elektrisidad las-7:30 kaina sang aga. (AGB/EDB)