Businessman Rommel Ynion, nagtanyag sang 100 mil pesos sa makatudlo sa nagpatay kay Mercedes Nava

Iloilo City— Nagtanyag sang P100,000 nga reward money ang negosyante nga si Mr. Rommel Ynion sa sin-o man nga makahatag sang impormasyon para matudlo kag madakpan ang nagpatay kay Mercedes “Gingging” Nava.

Si Nava ang ginpatay sang riding-in-tandem sa Calahunan, Mandurriao kahapon sang aga, Enero 4.

Patay man ang upod ni Nava nga si Erwin Fontillas.

Sa iya post sa Facebook, ginpahayag ni Ynion nga dapat mas mataas pa ang bounty kabangdanan nagpanawagan siya sa iban pa nga mga Ilonggos nga magbulig agud makatipon sang P5-million nga reward money.

Una dire ginpahayag ni Councilor Plaridel Nava nga sang 2012, antes ang eleksyon, nagpa-interview sa radyo ang iya pakaisa nga si Mercedes kag gin-akusaran ang konsehal nga amo ang yara sa likod sang pagpalupok sa Bali Hotel sa siyudad nga ginapanag-iyahan ni Ynion.

Si Mercedes sadto ang nagserbe nga whistle blower kag gintudlo niya sanday Councilor Nava kag anay Mayor Jed Patrick Mabilog nga amo ang nagpahaboy sang granada.

Si Ynion ang nagkandidato sadto sa pagka-mayor bunggo kay Mabilog.

Suno kay Councilor Nava, gingamit sadto si Mercedes nga testigo kag nagpahayag nga nabatian gid niya ang pag-istoryahanay sang konsehal kag ni Mabilog kag pagka-aga natabu ang explosion.

Nagpasaka man sadto sang kaso si Ynion batok kay Councilor Nava kag Mabilog pero gin-dismiss sang fiscal bangud wala sang probable cause. (AGB/MO)