MAG-AMAY, NA-RESCUE SA KADAGATAN SANG ANINI-Y, ANTIQUE

Antique (UPDATED) – Gin-confirmar sang Coast Guard Antique nga duha ang na-rescue nga nagapa-utaw-utaw sa kadagatan sang Anini-y.

Suno kay Lieutenant Commander Ramil Palabrica, spokesperson sang Coast Guard Western Visayas, indi ang boat captain kag crew sang sakayan nga nabungguan sang RORO vessel sa Iguana Bank sa Guimaras ang na-rescue.

Ang mga na-rescue amo ang mag-amay nga Jerry Ba-at, 40, kag Jerry Jr, 20, sang Nalundan, Guimbal. Nagkulob ang sakayan sang mag-amay matapos ginhampak sang balod kag napadpad sila sa kadagatan nga sakup sang Anini-y.

Las-11 kagab-i, ginreport nga nasalakay sang RORO vessel ang sakayan pangisda sang tatlo ka taga-Negros nga nagapangisda sa lawod sakup sang Iguana bank sa Guimaras.

Naluwas si Erwin Mansueto, 54, samtang missing ang iya mga kaupod nga sanday alyas Sito, 30, kag ang boat captain nga si Lopen Dispojo, 40. Lunsay residente ang tatlo sang Sitio Masipag, Punta Taytay, Bacolod City.  (JoMaque)