Motorsiklo kag Ceres bus, nagbungguanay sa Dumangas; Babaye nga driver sang motor, pilason

DUMANGAS, ILOILO — Nagbungguanay ang motorsiklo kag Ceres Bus sa Dumangas, alas 10 kaina sang aga (Enero 6).

Gin-identify ang driver sang motor kay Jessica Villanueva, 18 anyos sang Pagdugue, Dumangas.

Suno kay SPO3 Roger Parcon, halin sa barangay road si Villanueva kag pakadto sa direksyon sang Barotac Nuevo.

Samtang nagatabok sa National Highway, nagapadulong man ang Ceres Bus pakadto sa Barotac Nuevo nga ginamaneho ni Rogelio Gaitan Jr, 40 anyos sang Dueñas.

Ginyudyod sang Ceres bus ang motorsiklo ni Villanueva sang ginabanta 50 ka metros.

May pilas sa ulo si Villanueva kag may gasgas sa lawas.

Suno kay SP03 Parcon sang Dumangas MPS, conscious ang biktima sang gindala sa District Hospital sang Barotac Nuevo. Gin-refer na si Villanueva sa Western Visayas Medical Center.

Samtang, yara naman sa kustodiya sang pulis ang driver sang Ceres Bus. (JoMaque)