2 bodyguards ni Councilor Plaridel Nava, gindakup sang mga pulis angut sa pagtiro patay sa pakaisa sang konsehal; mga nadakpan, nakuhaan sang 3 pusil kag granada suno sa ICPO Director

Iloilo City— Gindakup sang mga pulis ang duha ka bodyguards ni Councilor Plaridel Nava angut sa pagtiro patay sa pakaisa sang konsehal nga si Mercedes ‘GingGing’ Nava kag isa pa sa Calajunan, Mandurriao sang Enero 4.

Suno kay Iloilo City Police Office (ICPO) Director Senior Supt. Martin Defensor Jr, may mga testigo ang Mandurriao police nga naka-identify kanday RoyRoy kag Tata Delos Reyes. Bisan una naguwa ang impormasyon nga nakasuksok sang mask kag helmet ang mga suspek, nakilala man sila sang mga testigo suno kay Defensor bangud indi full-faced ang helmet sang mga nagtiro kanday Nava kag Erwin Fontillas.

Indi kinahanglan ang warrant of arrest suno kay Defensor bangud kabahin pa sang hot pursuit operation ang pagdakup sa mag-utod.

Nakuha kay Tata Delos Reyes ang duha ka 45 cal pistol, tatlo ka magazine kag 29 ka bala, sling bag nga color brown kag may unod nga granada, holster, cellphone kag P12,000 nga cash. Nakuha naman kay RoyRoy Delos Reyes ang 45 cal pistol, magazine, pito ka bala, pouch nga color brown, cellphone  kag P1,770 cash. Nadakup ang duha sa City Hall.

‘Ginkwestyun’

Ginkwestyun ni Coucilor Nava ang pagdakup sang mga pulis sa iya duha ka bodyguards.

Nakibot si Nava sang nag-abot ang ginabanta 20 ka mga pulis kag nagsulod sa iya opisina kaina sang hapon kag gindakup ang iya bodyguards.

Suno kay Nava, kwestyunon niya sa korte ang ginbangil ni Defensor nga hot pursuit ang ginhimo sang mga pulis. Ginpabutyag ni Nava nga nahibaluan niya nga pasibangdan siya sa krimen bangud indi maayo ang relasyon nila sang iya pakaisa pero atubangon nila ang kaso. (AGB)