Pag-obligar sa nga barangay officials nga mag-‘vigil’ sa balay sang mga Garin, indi matuod suno sa ABC President sa Guimbal

Guimbal, Iloilo— Ginpanghiwala ni ABC President kag SB Member Marcelino Gelvero sang Guimbal nga may “vigil” sa balay sang mga Garin.

Kasunod ini sang eskandalo nga gin-ulamiran sang mag-amay nga Guimbal Mayor Oscar Garin kag Congressman Richard Garin angut sa ginpahayag pagsipa, pagsiko, pagtampa, pagdupla kag pagpalupok sang pusil sang kongresista kay PO3 Federico Macaya Jr.

Suno kay Gelvero, sa ila meeting sa liga sang damlag lang, naistoryahan nila nga magpakita sang suporta kay Mayor Garin bangud wala man suno sa iya nagsanyog ang banwa kun indi tungod sa mga Garin, sa tunga sang isyu batok sa pamilya.

Ginpahayag ni Gelvero nga depressed ang mayor sa natabu kabangdanan nadesisyunan nila nga magpakita sang suporta.

Pero gin-athag ni Gelvero nga indi obligado ang mga barangay officials halin sa 33 ka barangay nga magpakita gid sa balay sang mga Garin. (AGB/MO)