Reward nga ginpromisa sang negosyante sa makatudlo sang killer ni Mercedes Nava, ginaproseso na

Iloilo City— Ginaproseso na sang mga tinawo ni businessman Rommel Ynion ang reward nga ihatag sa mga nagtudlo sa mga suspetsado sa pagpatay kay Mercedes “GingGing” Nava kag sa iya kaupod sa Calajunan, Mandurriao sang Enero 4.

Suno kay Ynion, may confidential channel nga mahatag sang reward sa police. Police na ang bahala maghatag sa mga testigo bangud gin-aku niya nga indi niya kilala ang mga testifo kag wala man siya sang plano nga magpkilala sa ila.

Gin-athag ni Ynion nga kutob na lang siya sa paghatag sang reward bilang pagtuman sa iya promisa kag wala na sang plano pa nga magpasilabut sa iban nga bagay angut sa kaso sang mga suspetsado bangud indi niya gusto nga mga misinterpret siya.

Dugang pa niya, pati siya ang nasubuan man kag nakibot sang naulamid ang pangalan ni Councilor Plaridel Nava sa natabu bangud mga bodyguards sang konsehal ang mga ginpang-aresto nga mga suspetsado.

Una nga nagpaguwa sang statement si Ynion paagi sa iya Facebook post nga mahatag siya sang P100,000.00 nga reward sa makatudlo sa killer ni Ging-ging Nava, apang nadugangan pa gid ini sang P125,000.00 halin sa mga wala na nagpakilala nga mga persona. (AGB/KJT)