(UPDATE) Councilor Plaridel Nava, ginapaabot na ang pagdalahig sa iya sa pagpatay sa iya pakaisa nga si Mercedes Nava

Iloilo City— Ginapaabot na ni Councilor Plaridel Nava nga dalahigon siya sa pagpatay sa iya pakaisa nga si Mercedes ‘GingGing’ Nava.

Sa pihak ini suno sa iya sang pag-ako sang mga utod ni GingGing nga wala sila nakahambal nga suspek sa krimen ang konsehal.

Nahibaluan na ni Councilor Nava nga sa tion madalahig sa kontrobersiya ang mag-utod nga Roy kag Rey Julius ‘Tata’ Delos Reyes nga iya mga bodyguards, maulamid man siya bangud sang record sang duha. Pero ginhambalan sang konsehal ang mag-utod nga magpreparar kag siguraduhon nga inosente sila sa kaso bangud natabu na sang una ang kapareho nga scenario samtang nagahilapit ang eleksyon.

Gin-ako naman ni Councilor Nava nga may mga kaso sang pagpangawat kag pagpanghold-up ang mag-utod nga wala pa man tubtob subong sang conviction, pero indi nila mahimo ang magpatay.

Ginpasiguro ni Nava nga mapasaka man sila sang kaso batuk sa mga pulis nga nag-upod sa pagdakup sa iya bodyguards. Ginpanindugan sang konsehal nga planted ang tatlo ka pusil kag granada nga nakuha sa iya mga bodyguards. 

Gin-ako ni Nava nga ginapabitbit niya sang iya .9mm nga pusil nga lisensyado ang mag-utod pero ginabilin ini sa salakyan kon magsulod sa city hall.

Nahibaluan suno sa iya sang mag-utod ang pagsulundan sa city hall nga nagabawal sa pagpasulod sang pusil kag indi man siya magpasugot nga magdala sang granada ang iya boyguard bangud mabutang sa alang-alang ang safety sang iya pamilya. (AGB)