Hepe sang Mandurriao Police Station, ginatudlo sa PRO6 ang pagsabat sa mga palamangkutanon natuhoy sa ginpasaka nga kaso batuk sa mag-utod nga Delos Reyes nga suspek sa pagpatay sa pakaisa sang konsehal

Iloilo City (UPDATE) — Gintudlo sang hepe sang Mandurriao Police Station sa Police Regional Office 6 spokesperson ang pagsabat sa pamangkot kon ngaa murder kag indi double murder ang ginpasaka nga kaso batuk sa mag-utod nga Roy kag Rey Julius Delos Reyes.

Angut ini sa pagtiro patay kay Mercedes Nava kag iya kaupod nga si Erwin Fontillas sa Calahunan, Mandurriao sang Enero 4.

Suno kay Chief Inspector Marlon Valencia, na-forward naman nila sa PRO 6 ang tanan nga dokumento sa kaso.

Nagbalibad pa nga magkomento si PRO 6 spokesperson Supt. Joem Malong bangud makonsulta pa siya sa ila legal division.

Gindakup kag ginkasuhan ang mag-utod matapos gintudlo sang mga testigo sang police nga amo ang naghimo sang krimen.

Sanday Roy kag Rey Julius ang mga bodyguards ni Councilor Plaridel Nava, pakaisa sang napatay nga si Mercedes Nava.

(Ariel Solacito)