Maglive-in partner nga pangayaw sa Iloilo City, dakup sa buy bust operation; Masobra tunga sa milyon ka pesos nga balor sang suspected shabu, na-recover

Iloilo City – Dakup ang maglive-in partner nga pangayaw sa drug buy bust operation sa Barangay Rizal Estanzuela, City Proper kagab-i, Enero 8.

21 ka sachets sang suspected shabu nga ginabanta nagabalor sang P750,000 ang nakuha kanday Janice Pansoy alyas Jopay, 22 sang Naga City, Cebu, kag Raymund Baclado sang Mandaue City, Cebu pero temporaryo nga naga-istar sa Rizal Estanzuela.

Suno kay Rizal Estanzuela, City Proper Barangay Kagawad Archie Agustin, makaduluda ang hitsura sang duha gani iya ginhingyu ang tag-iya sang balay nga ginadayunan nga panilagan ang ila hulag. Sang nagbakasyon ang maglive-in partner sang paskuwa kag gin-usisa ang kwarto, may nakita nga aluminum foil.

Suno naman kay Senior Inspector Mark Dado sang Regional Drug Enforcement Unit, nagabalor sang P35,000 ang kada sachet sang suspected drugs. Subject sang operasyon si Pansoy.

Natukiban ang operasyon ni Pansoy matapos ang gin-conduct nga buy bust operation sang RDEU sa Bacolod City. Halin sa Cebu, nagahapit ang duha sa Bacolod City agud magbaligya sang illegal drugs antes magpadulong sa Iloilo City.

May nakita man nga video ang RDEU sa cellphone ni Pansoy sang ginpahayag mga estudyante nga naga-roro sang shabu. Nagapati si Dado nga sa Iloilo lang kuha ang mga video nga subject sa ila imbestigasyon.

Posible suno kay Dado nga may dalagku nga personalidad sa likod sang operasyon sang duha. Ginpasiguro ni Dado nga gina-imbestigaran na nila ang koneksiyon sang mga nadakpan.

Nag-aku si Pansoy nga naga-trabaho siya bilang GRO sa night club sa City Proper. Ginapanginwala naman niya nga siya ang nagapanag-iya sang mga recoveries. (JoMaque)