Coast Guard Iloilo, nagapanghanda para sa Dinagyang Festival

Iloilo City–Hugtan ang seguridad sa mga pantalan sa Iloilo sa pagdagsa sang mga turista nga magasaksi sang Dinagyang Festival 2019.

Suno kay Lt. Com. Rodolfo Dela Peña sang Coast Guard Iloilo, ini kabahin sa mga safety measures nga ipatuman sa paghiwat sang Dinagyang Festival subong nga tuig.

Suno kay Dela Peña, may ipahamtang nga passengers’ assistance desks nga pagabug-usan sang taga-PPA, MARINA, Coast Guard kag Medical Team sang Coast Guard sa mga ports sa Iloilo para nga maghatag sang assistance sa mga pasahero.

Maga-coordinate man sila sa Iloilo City Emergency Responders (ICER) kun may i-provide sila nga mga personnel.

May mga K9 man nga i-deploy sa mga pantalan kag gin-alerto sang coast guard ang ila mga floating assets nga naka-standby subong sa Muelle Loney area para gilayon makaresponder kun may mga maritime incidents.

Tubtob nga nagapadayon ang operation sang mga pantalan sa kahiwatan sang Dinagyang Festival, magapadayon man ang operation sang coast guard.

Enero 20, magasugod ang operasyon kag posible magalawig ini tubtob Pebrero 1. (JoMaque)