IPPO director kag pulis nga nagreklamo batuk sa mag-amay nga Garin, gin-imbitar nga resource persons sa Kongreso

Iloilo— Ginkumpirmar ni Iloilo Police Provincial Office (IPPO) Director PSSUPT Marlon Tayaba nga nakabaton siya sang direktiba halin sa PNP Central Office para magtambong sa hearing sa kongreso sa Lunes, Enero 14, las dos sa hapon.

Upod ni Tayaba nga magapadulong sa Manila si PO3 Federico Macaya Jr, ang pulis nga nagreklamo gintampa, ginsipa, ginsiko, ginduplaan kag ginpalukpan pusil ni Congressman Richard Garin kag yara man ang presensiya ni Guimbal Mayor Oscar Garin sang Disyembre 26, 2018 sang kaagahon.

Magluwas sa ila, may mga opisyal man halin sa Camp Crame nga gin-imbitar suno kay Tayaba.

Maupod man sa ila sa hearing si Police Regional Office 6 Director Chief Supt. John Bulalacao.

Huwebes sang gab-i sang nabaton ni Tayaba ang imbitasyon.

Sa impormasyon ni Tayaba, maga-deliver sang privilege speech si Pangasinan Congressman Leopoldo Bataoil.

Si Bataoil ang nangin Provincial Director sang Negros Occidental sang 1990s kag nangin regional chief sang Operations and Plans Division sang PRO 6. (AGB/MO)