Masobra apat ka libo ka estudyante, nagpasakup sa Barkada Kontra Droga sa Janiuay

Janiuay, Iloilo — Masobra 4,000 ka mga estudyante halin sa 121 ka secondary schools sa probinsya ang nagpartisipar sa “Barkada Kontra Droga” nga ginhiwat sa Janiuay Comprehensive National High School.

Ang tatlo ka adlaw nga BKD outreach and convention nag-umpisa kahapon, Enero 11.

Suno kay Atty Fevi Fanco, Division Adviser sang Barkada Kontra Droga, ini na ang ikapito ka tuig nga paghiwat sang “Barkada Kontra Druga” nga gin-establisar sang 2012.

Katuyuan sini suno kay Atty Fanco nga mapahibalo ang mga estudyante sa halit sang illegal drugs kag ma-engganyo ang mga eskuwelahan kag estudyante nga magbuligay agud matapna ang paglapta sang illegal nga druga.

Lakip sa mga aktibidad sa tatlo ka adlaw nga BKD ang essay writing, spoken poetry, role playing, search for Mr and Ms BKD, jingle making, battle of the bands kag iban pa.

Kaina sang aga, Enero 12, ginhiwat ang foot parade kag opening program sa banwa kaupod ang nagkalain-lain nga sector sa komunidad lakip na ang PNP, PDEA, DOH, LGU kag media. (AGB)