Rifle grenade, nasapwan sa kisame sang balay sa City Proper

Iloilo City— Yara na sa kustodiya sang Explosive and Ordnance Division sang Iloilo City Police Office (ICPO) ang rifle grenade nga nakit-an sa kisame sang balay sa Brgy. Concepcion, City Proper. 

Suno kay Police Inspector Reman Benobo sang EOD Canine group, nakit-an ni Domingo Provido ang rifle grenade sa kisame sang ila balay nga iya tani kaayuhon kahapon sang hapon, Enero 11. 

Ginpahayag ni Benobo nga delikado ang rifle grenade kon makakas ang pin kag makalampus sa matig-a nga bagay.

Suno naman kay Provido, posible nga iya sang mga miembro sang Philippine Army nga naga-board sang una sa ila balay ang nakit-an nga rifle grenade. 

Nagapati si Provido nga posible nalipatan ini sang mga suldado sang naghalin na sa ila balay.  (AGB/JGM)