Simultaneous Comelec checkpoints sa kabanwahanan sa Iloilo province, ipatuman sa pagsugod sang election period

Iloilo— May simultaneous ceremonial kick off sang pag-implementar sang Comelec checkpoints sa tanan nga kabanwahanan sa probinsiya sang Iloilo buwas sa kaagahon, Enero 13.

Alas 12:01 sa kaagahon, dululungan nga magapahamtang sang mga checkpoints sa mga banwa sa probinsiya suno kay Comelec Provincial Office OIC Atty. Roberto Salazar kadungan sang pagsugod sang election period para sa May 13, 2019 midterm elections.

Magasugod man buwas ang total gun ban luwas lang sa mga ginhatagan sang exemption nga magdala sang pusil pareho sang mga pulis kag suldado nga dapat naka-uniporme kag on-duty.

I-recall man ang mga detailed security personnel luwas lang sa mga nag-apply kag nahatagan authority sang Regional Joint Security Committee kag Committee on the Ban of Firearms and Security Personnel.

Suno kay Salazar, visual search lang ang puwede himuon sa checkpoint kag indi puwede makapang-ukay ang mga otoridad luwas lang kun magpasugot ang tag-iya sang salakyan. (AGB/MO)