Lalaki, patay matapos nalukpan sang ginasukbit nga pusil sang naaksidente sa motorsiklo sa Jaro

Jaro, Iloilo City – Patay ang lalaki matapos nalukpan sang ginasukbit nga pusil sang naaksidente ang ginamaneho nga motorsiklo sa Barangay Lanit kaina sang hapon, Enero 12.

Ginkilala ang biktima kay Michael Tabuada, 42 anyos sang Barangay Tacas, Jaro nga may pilas sa pus-on lapos sa paa.

Suno kay PO3 Jury Junio, traffic investigator sang Jaro Police Station, nakabunggo sa ginasundan nga owner type jeep ang motorsiklo ni Tabuada gani natumba.

Posible suno kay Junio nga madasig ang dalagan sang motorsiklo bangud nagupi gid ang salsalon sa likod nga parte sang owner type jeep.

Sa pagpangusisa sang pulis sa mga nakakita, nakibot lang sila sang may naglupok sang natumba ang motor.

.38 caliber ang ginpahayag ginasukbit ni Tabuada sa hawak. (JoMaque)