Van, jeep kag motorsiklo nagkarambola sa Janiuay ; 7 pilason

Janiuay, Iloilo — Pito ang pilason matapos nagkarambola ang depasahero nga van, jeep kag motorsiklo sa Barangay Abangay, Janiuay kaina sang aga, Enero 13.

Suno kay PO2 Raymond Dailan, imbestigador sang Janiuay Police Station, gindala sa ospital ang mga sakay sang van nga kanday Ane Rose Agustino, 24-anyos ; Clarise Faith Cerbas, 21-anyos ; Leo Compleza, 28-anyos ; PO2 Jose Leo Tavilla, 50-anyos ; Ternabe Loder, 39-anyos kag ang tatlo ka tuig nga si alyas Inday, nga lunsay pumuluyo sang Lambunao.

Gindala man sa ospital si Learnie Guevarra, 58-anyos sang Oton kag ang driver sang motorsiklo nga si Sunny Cabiltes, 48-anyos sang Janiuay.

Lunsay may mga menor nga pilas ang mga natungdan.

Sa imbestigasyon sang pulis, halin sa Janiuay kag pakadto sa Lambunao ang nagasundanay nga motorsiklo, van kag jeep sang nagluntad ang insidente.

Ginpahayag nag-overtake sa motorsiklo ang van kag jeep apang nagbalik sa ila lane bangud sang nagasugata nga motorsiklo.

Nalab-ot sang jeep ang likod nga parte sang van rason nagbulid bulid ang salakyan kag nalab-ot man ang motorsiklo nga ginamaneho ni Cabiltes suno sa pulis.

Nag-areglohanay ang mga involved sa insidente. (JoMaque)