IPPO Director Marlon Tayaba kag PO3 Federico Macaya Jr, ipatawag sa House Ethics Committee sa reklamo kontra kay Congressman Richard Garin

Iloilo City–Ipatawag sanday Iloilo Police Provincial Office (IPPO) Director PSSUPT Marlon Tayaba kag PO3 Federico Macaya Jr sa tiun mag-convene ang Ethics Committee sang Kamara.

Kahapon, Enero 14, nagtambong ang duha sa plenary session sang kongreso sa diin nag-deliver sang privilege speech si Pangasinan Rep. Leopoldo Bataoil.

Sa iya speech, ginhinambit ni Bataoil ang natabu kay PO3 Macaya nga nagreklamo ginsipa, gintampa, ginsiko, ginduplaan kag ginpalukpan pusil ni Congressman Richard Garin sa presensiya sang iya amay–Guimbal Mayor Oscar Garin sang Disyembre, 2018.

Suno kay Tayaba, gin-approach sila sa bench matapos ang speech ni Bataoil kag ginpahibalo sila nga wala na-acknowledge si Macaya.

Ginhambalan sila nga si Macaya ang nagarepresentar kag nagasimbolo sang bilog nga PNP organization.

Luyag sang mga kongresista nga nangin PNP officials man sadto nga ipahibalo sa ila kaupdanan sa kongreso nga ang pag-abuso sa police nga naka-uniporme kag nagahimo sang ila trabaho ang makabig nga pag-atake sa organisasyon.

Nakahanda sanday Tayaba kag Macaya nga magtambong pananglitan ipatawag sila sang Ethics Committee.

Una dire ginpahayag ni House Minority Leader Danilo Suarez nga posible ma-imbestigaran si Congressman Garin sa ginhimo niya kay Macaya.

Suno kay Suarez, kinahanglan nga may valid complaint batok kay Garin antes siya ma-imbestigaran.

Ang reklamo mahimo i-file sa Ethics Committee sang sin-o man nga indibidwal ukon miyembro sang Kamara.

Sa idalum sang rules sang House, ang sin-o man nga indibidwal nga na-agrabyado sang kongresista mahimo magdangup sa Secretary-General nga amo ang maga-refer sang ethics complaint sa Rules Committee.

Kun mabaton sang Rules Committee ang reklamo, i-kalendaryo ini sa plenaryo sang Kamara para sa 1st reading antes ipadala sa House Ethics Committee. (AGB/MO)