IPPO Director Marlon Tayaba, wala pa sang mandu agud mangin bag-o nga BCPO Director

Iloilo City–Labi nga nagbaskog ang mga huring-huring nga ibutang bilang director sang Bacolod City Police Office (BCPO) si Iloilo Police Provincial Office (IPPO) Director PSSUPT Marlon Tayaba.

Kasunod ini sang eskandalo nga nagtay-ug sa BCPO matapos ginhingadlan ni Presidente Rodrigo Duterte ang lima ka opisyal sang amo nga police office nga naulamid sa illegal drugs.

Pero suno kay Tayaba, wala pa siya sang mandu nga nabaton sa spekulasyon nga magabulos siya bilang BCPO director.

Pananglitan may mandu, indi niya ini mabalibaran.

Gin-athag ni Tayaba nga may nabilin pa siya nga binulan bilang IPPO director kag posible isa man sa ikunsiderar sang PRO 6 suno sa iya ang election ilabe pa nga naplastar na ang security plans para sa bilog nga probinsiya.

Gin-relieve ni PRO 6 Director PCSUPT John Bulalacao ang lima ka police officials nga sanday S/Supt. Francisco Ebreo, officer-in-charge city director ng BCPO; Deputy for Operations nga si P/Supt. Allan Macapagal; P/Supt. Richie Yatar; P/Supt. Nassrudin Tayuan, anay team leader sang Bacolod City Drugs Enforcement Unit pero nakabase na sa Mindanao kag si S/Insp. Victor Paulino, anay hepe sang Police Station 3 matapos sila ginhingadlan ni Duterte.

Magluwas sa lima ka police officials, ginhingadlan man sang presidente si Bacolod City Councilor Ricardo ‘Cano’ Tan nga naangot sa illegal drugs. (JoMaque)